Лариса Долина: Муреккеплигине коре джазны классика иле тенъ демек мумкюн
Koktebel Jazz Party — 2015 фестивалинде учюнджи куннинъ хедлайнери, Игорь Бутманнынъ биг-бэнди иле бераберликте чыкъышта булунаджакъ Лариса Долина сая ки, муреккеплигине коре джазны классик музыка иле тенъ демек мумкюн ве шимди онынъ рагъбетлиги арта, чюнки адамлар бираз джиддий, джанлы музыка истейлер.
«Джазгъа эр вакъыт чешит бакъа эдилер. Бу муреккеп жанр, о къассика иле тенъ. О ич бир вакъыт биринджи ерде турмай эди, чюнки биринджи ер — бу эр вакъыт поп-музыка. Джаз чалмакъ ве йырламакъ ичюн чокъ чалышмакъ, чокъ бильмек керек, ве бу истидат иле догъмакъ керек. Свинг дуйгъусыны эльде этмек мумкюн дегиль. Эгер о сенде олса, сен оны инкишаф эте билесинъ — мешгъулиетлер иле ве импровизациялар иле. Онынъ ичюн джаз вокалджылары бутюн дюньяда пек чокъ дегиль. Мен частлым, мен буннен догъдым ве осьтим. Бунъа бакъмадан джазнынъ алтын фонды буюктир ве онынъ адлары чокъ», — деп, къайд этти о.
Лариса Долина июльнинъ сонъунда энди Къырымгъа гастролер иле кельген эди, анда о юбилей программасыны такъдим этти, бу программада симфоник оркестр иштирак эткен эди.
«Оркестр аджайип эди, чалгъыджылар Къырымнынъ чешит театроларындан топлангъан эдилер. Бизде пек гузель концертлер олды, сейирджилер бизни аякъ устюнде озгъарды, ве эр бир концертте биз бис ичюн чала эдик. Адамлар джанлы, акъикъий ве темиз музыкагъа ынтылгъанлары аджайип, олар фонограммалардан бездилер», — икяе этти йырджы.
Лариса Долина Игорь Бутманнен ишбирлик тарихы акъта да икяе этти. «Биз Игорьнен 2000 сене бизим «Карнавал джаза» адлы ильк программамызны такъдим эткен эдик. Биз гастроллерге чокъ къатнашып, эписи шеэрлерде аншлаглар топлай эдик. Халкъ келе эди ве эр кез бахытлы ола эди. Игорьнинъ биг-бэнди энъ гузель, ве тек Русиеде дегиль, Авропада, ве АКъШ биг-бэндлеринен ракъиплик эте биле», — фикир пайлашты о.
Йырджы Игорь Бутман пек истидатлы ве теджрибели олгъаныны айырыджа къайд этти. «Онынъле чалышмакъ къолай ве хош келе. Экинджи программамызны биз бир къач йылдан сонъ эттик ве онынъле эм Исраильге, эм АКъШ-на баргъан эдик. Биз америкалылар ичюн иджра эте эдик, ве олар Русиеде импровизация йырлагъан йырджы олгъанына пек тааджипленген эдилер. Биз Игорьнен бир далгъада булунамыз», — деп, екюн чекти Лариса Долина.