Михаил Иконников: Мен озюм чалгъыджыларны араштырмагъа севем
— Михаил, даа нетиджелер чыкъармакъ эрте, амма бу дакъикъагъа фестиваль насыл кече?
— Шимдилик биринджи кунь боюнджа къыймет кесмек мумкюн. О, меним фикиримдже, пек гузель кечти. Биз планлаштыргъанымыз киби,сейирджилер чокъ эди. Эм партер, эм ялы толу эди. Сес ве ышыкъ боюнджа ич бир тюрлю тазирлер ола бильмей, чюнки буннен мутехассыз инсанлар огърашалар. Иджраджылар озьлери мемнюнлер, бу пек эмиетли. Will Johns, сиз, корьген олсанъыз керек, къабул этильгенине пек къуванды ве бис ичюн чалды.
Яков Окуньнинъ усталыгъына юксек къыймет кесем, о къыйын вазиетте булунды, онынъ ичюн хедлайнер эди, онынъ огюнде исе эр кесни аякъкъа тургъызгъан адам чыкъышта булунды. Амма бунъа бакъмадан о ойле чалды ки, сейирджилер оны анъладылар: акъикъаттен, бу тамам хедлайнер.
— Сёз сырасы, Will Johns акъкъында. Кечкен сене бир де бир интервьюда сиз фестивальде блюз чалгъыджылары етишмей деген эдинъиз. Оларны келеджекте давет этмеге планлаштырасызмы?
— Мытлакъа. Бу сене мен эксперимент кечирдим, яхшы да манъа бир кимсе «ёкъ» демеди, ве эр кез эксперимент яхшы екюнленгенини корьди. Мен атта бойле шейни ред этмейим: бельки, биз эр кунь бир блюз чалгъыджыны кетирермиз.
— Я даа бир тюрлю услюплерни къошмагъа ниет этесизми? Бельки, рок-н-ролл?
— Рок-н-ролл… Эр алда ич те джаз тедбири олмагъан шейни япмагъа пек яман истемеймиз… Биз чешит блюзны алармыз. Атта эгер Will Johnsтан сонъ келеджек бир талай британ чалгъыджыларны алсакъ, олар эписи берабер чалышалар, бир импресарио аркъалы Москвагъа келелер. Олар чешит блюз чалалар: бириси зиядедже рок союны, кимериси зиядедже джаз союны, кимериси зиядедже фанк союны. Онынъ ичюн олар эписи къысымларны толдурарлар, ве буннен берабер биз джаз фестивали концепциясындан пек узакъ кетмемиз. Менимдже, пек яман инат олмакъ мумкюн дегиль: джаз фестивали — э, догъру, амма биз оны озюмиз ичюн япмаймыз, адамлар ичюн япамыз. Биз олар насыл музыканы пек гузель къаршылагъаныны коремиз, ве концепциядан пек уъакъ кетип отурмамыз, лякин эгер сынъыр бою, ошагъан бир шей япкъандан не зарар?
— Кечкен сене бир де бир интервьюда сиз джазгъа янъы сейирджилерни джельп этмеге истегенинъиз акъта айткъан эдинъиз. Сонъ, оламы?
— Шимдилик айтмакъ къыйын. Кечкен сене фестиваль кузьде кечти, шимди исе язда, адам чокъча. Янъы сейирджилер кельдилерми, ёкъмы, айта бильмейим.
— Тюневин матбуат-конференция кетишатында КНР-ден мухбир Къытай джазменлерини давет этмеге теклиф этти. Бу акъта не тюшюнесиз?
— Мен оларнен багълангъаным ёкъ. Бойле алда бир кимсе тевсие эткенден коре, мен озюм Къытайда джаз чалгъанларны тапып кетирсем, меракълыджа олур. Менде бойле ал олгъан эди: бириси башкъасынынъ танышы, оны тевсие эте, манъа исе «ёкъ» демеге къыйын, амма мен бу адам бираз келишмегенини анълайым. Онынъ ичюн озюнъ YouTube къарыштырсанъ, Къытай сайтларында, шимди эр шей инглисче текрарлана.
— Экзотик мемлекетлерден иджраджылар акъта тюшюнмеген эдинъизми? Бельки, КНДР-ден?
— Биз эр бир мемлекеттен давет эте билемиз, кене де эгер бунъа сиясий вазиет кедер этмесе. Лякин олар севиеге уйгъун олмакъ кереклер. Тирелип, огюнъе эр ерни экзотик мемлекетлер иле толдурмакъ макъсадыны къоймакъ — бу догъру дегиль. Эгер биз севиесине коре русиели чалгъыджыдан артта къалгъан иджраджыны кетиргенимизни анъласакъ, буны япмагъа не керек? Даа бир байракъкъа ишарет къошмакъ ичюн? Меним фикиримдже, бу догъру дегиль.