Дмитрий Щепетков: Koktebel Jazz Party – бу биринджи ерде тургъан вакъиа

Коктебельде кечкен Koktebel Jazz Party халкъара джаз фестивали — Къырым фестиваллерининъ джедвелинде биринджи ерде тургъан вакъиа, буны Кефе шеэрининъ башы Дмитрий Щепетков бильдирди.

«Меним фикиримдже, Koktebel Jazz Party — бу Къырым фестиваллерининъ джедвелинде биринджи ерде тургъан вакъиа. Бу сене о 13-нджи кере кечириле. Онынъ бутюн тарихы девамында бу тек Коктебельнинъ ве Кефенинъ дегиль, бутюн Къырымнынъ имидж тедбири олды», — деди Дмитрий Щепетков.

Онынъ айткъанына коре, фестиваль джельп эткен адамларнынъ энъ зияде сайысы тахминен 30 бинъ адамны тешкиль эте. Буннен бирге, онынъ сёзлерине коре, бу энъ юксек мевсимде олгъан шей дегиль.

«Бизлер, ерли акимиет ичюн мевсим сынъырларыны кенишлетмек гъает муим. Биз фестиваллер кечирилювинден гъайры, башкъа механизмлерни корьмеймиз», — деди Кефе башы. Онынъ фикириндже, бойле тедбирлер кечирилюви эм ерли туризм инкишафына, эм джумхуриет ихтисадиетине эйи тесир эте, эм де тасиль вазифесини ташый.