Яков Окунь: Мен озь биринджи jam sessionымны яхшы хатырлайым

— Сиз тюневинъки чыкъышынъызгъа насыл къыймет кесесиз? Сиз чалгъыджылар иле чалып алыштынъызмы?

— Бу шей ичюн чокъ вакъыт керек дегиль, бунынъ ичюн садедже санагъа сен шерик киби корьген чалгъыджыларынъ иле чыкъмакъ керексинъ. Умумен, алышмакъ ичюн адетиндже учь дакъикъа керек.

— Сиз, асылында, озь коллективлеринъиз ичюн насыл этип чалгъыджыларны сечесиз?  

— Эр шей тек меним гонюль истегимнен  ве чалгъыджы такъдим эткен бу я да дигер эстетика манъа не къадар якъын олгъаны иле багълы.

—  Тюневин бир къач кене бойле фикир сеслендирильди: тедбир дюньянынъ энъ гузель джаз-фестиваллери севиесинде тешкиль этильген. Разысызмы?

— Э, догъру.

— Къайсы бир джаз-йылдызы иле сиз илькиде чалгъанынъызны хатырлайсызмы? Бу не вакъыт олгъан шей?

— Мени бабам биринджи кере jam sessionгъа отурткъаныны пек яхшы хатырлайым, мен энди баягъы буюген эдим, чюнки джаз музыкасы иле кеч, 16 яшымда, огърашып башладым. Ве асылында, джаз иле буген чагъынъда огърашмакъ керексинъ деп, саям. Яни джаз чалгъан балалар мен анълагъаныма коре, вундеркиндлер. Ана, мен манъа 18, я да 19 яш олгъан вакъытны, мени бабам бизим мешур чалгъыджымыз Виктор Двоскин иле jam sessionгъа отурткъаныны  хатырлайым. Къайсы бир фестиваль эди, оны тап  Юрий Сергеевич Саульский япа эди. Ве о бабам янына келип: «Миша, Яшка гузель чала да, ана отурт оны» деди. Меним бундан себеп къуванчым акъылымда.