Stefano di Battista: Бизим программамыз мешур къадынларгъа багъышлана

Stefano di Battista итальян джаз квартети Koktebel Jazz Party — 2015 фестивалинде мешур къадынларгъа — Анна Маньяни, Коко Шанель, Валентина Терешковагъа ве дигерлерге багъышлангъан эсерлерни такъдим этеджек.

«Бизим программамыз мешур къадынларгъа багъышлана: Анна Маньяни, Молли Блум Джойснынъ «Улисс» эсеринден, кяинаткъа учкъан биринджи къадын Валентина Терешкова», — икяе этти Stefano di Battista.

Даа бир уйдурылгъан персонажгъа — Лара Крофткъа багъышлангъан эсерлер янъгъырайджакъ.

«Биз мында булунмакътан пек мемнюнмиз. Языкъ ки, биз Русиеде сийрек оламыз. Кимерде Москвада я да Санкт-Петербургта чаламыз ве эр сефер сейирджилеримизге хусусий бир шей бермеге тырышамыз. Умют этемиз ки, илериде де Русиеге, бу фестивальге де келермиз», — деп, къошты чалгъыджы.

Эм Stefano di Battista Koktebel Jazz Party — 2015-нинъ пек гузель тешкиль этилювини къайд этти.